1. Nix för ungood, Suldat Janssen, man mien Gruweln lett nich na,
wenn ik hier bi di an dien Grafftstee sitten gah.
Verhaal mi en Sett – So warm schient de Sünn!
So bliev ik bi di för en lütt Viddelstünn.
Man ik seeg up dien Grafftsteen, du weerst eerst neg’nteihn Jahr,
büst al fall’n för de Kaiser, Neg’nteihn - Sessteihn. Gloria!
Geiht dat fix bi so ‘n Held, wenn sien Ogen denn breekt,
of, segg, Suldat Janssen, büst du elennig verreckt?

Refrain: Sloog de Trummel ganz luud? Geev dat „Ehrensalut“?
Geev de Preester sien Segen, un se leten di in ‘t Grafft?
Hett dar well ok en Leed för di sungen?
Un de Trummels, un de Trummels, hebbt de klungen?

2. Büst verheiraadt, versproken? Büst en Leevsten, en Fründ,
dat van Harten ok Gedanken noch för di bleven sünd ?
Man büst du ok fall’n Neg’nteihn - Sessteihn - Gloria! -
well noch an di denkt, för de bleevst du neg’nteihn Jahr.
Of büst du en van de Frömden, büst verloren, unbekannt.
van de dat hier so völ geev in de Höll van ‘t Niemandsland.
In de Holtrahm achter’n Glasschiev seeg ik bleek un ganz dünn:
Dit oll’ Foto weer dien Passbild, ganz verfreten van de Sünn.

Refrain

3. Och, so warm, as hier de Wind weiht, dat Land straakt un eit,
un de rode Mahn, de gleiht so, he danzt, wenn he bleiht.
All de Grabens, all de Löcker sünd al lang unnern Ploog,
van de Gasgranaten geev dat mehr as genoog.
Man so ‘n Acker vull van Doden blifft alltied Niemandsland,
all de Krüzen sünd de Tügen för blinnen Unverstand:
van ‘t Strammstahn, Steken, Scheten: de Nahber sien Kind,
wenn en Jahrgang achter ‘n annern na de Slachtbank hen findt.

Refrain

4. Un denn mutt ik mi noch fragen, Suldat Janssen, mien Fründ:
Weet all hier, de hier dood liggt, wor se um stürven sünd?
Deest du ehrelk daaran glöven, as se seen, wo dat weer,
dat de Stried för alle Tieden dör de Krieg to Ennen weer?
Ganz vergevens weer dat Lieden, weer de Stolt, weer de Nood!
Ganz vergevens weer dat Moorden, weer de Schann’, weer dien Dood;
Denn Suldaten heet noch Janssen, staht noch stramm, alltied weer,
alltied weer un alltied weer, alltied weer, alltied weer.